சோளிங்கர், டிச.16–

சோளிங்கர் அடுத்த அரியூர் கூட்டு ரோட்டில் அம்பேத்கர் முழு உருவ சிலை வைக்கபட்டு இருந்தது. இன்று அதிகாலை அப்பகுதியில் சென்றோர் அம்பேத்கர் சிலையில் கை பகுதி உடைக்கபட்டு இருப்பதை பார்த்தனர்.

இந்த தகவல் அக்கம் பக்கத்தில் உள்ள கிராம பகுதியிலும் பரவியது. அம்பேத்கர் சிலை அருகில் சுமார் 100க்கும் மேற்பட்ட ஆண்களும், பெண்களும் திரண்டனர்.

சோளிங்கர் – அரக்கோணம் ரோட்டில் அமர்ந்து சாலை மறியலில் ஈடுபட்டனர். இதனால் அப்பகுதியில் போக்குவரத்து பாதிக்கப்பட்டது. சிலையை சேதப்படுத்தியவர்களை கைது செய்ய வேண்டும் என கோஷமிட்டனர் இதனால் அப்பகுதியில் பதட்டமான சூழ்நிலை ஏற்பட்டது.

சம்பவ இடத்திற்கு போலீஸ் சூப்பிரண்டு விஜயகுமார் டி.எஸ்.பி.சீத்தாராமன் தலைமையில் போலீசார் விரைந்து சென்றனர். அவர்கள் பொதுமக்களிடம் பேச்சுவார்த்தை நடத்தி வருகின்றனர்.

தொடர்ந்து அங்கு பதட்டமான சூழ்நிலை ஏற்பட்டுள்ளதால் ஏராளமான போலீசார் குவிக்கப்பட்டுள்ளனர்.

செய்தி : மாலைமலர்


படங்கள் : Parthiban Govindaraj